ગુજરાતમાં તૌકતે વાવાઝોડાના કારણે ભારે નુકસાનની સાથે અમરેલી વિસ્તારમાં 18 એશિયાટીક સિંહ ગુમ થયા હોવાની વાત પર વન વિભાગે સ્પષ્ટતા કરી કે, આ માત્ર એક અફવા હતી
રાજ્યમાં તાજેતરમાં આવેલા તાઉ-તે વાવાઝોડા અંતર્ગત સૌરાષ્ટ્ર વિસ્તારમાં 18 એશિયાટીક સિંહો ગુમ થયા અંગે વન વિભાગે સ્પષ્ટતા કરતાં જણાવ્યું છે કે, ગીર અને બૃહદગીરના તમામ એશિયાટીક સિંહો સલામત છે. આ વિસ્તારના એક પણ એશિયાટીક સિંહનું મોત થયુ નથી કે કોઈ પણ પ્રકારનું નુક્સાન થયુ નથી. વન વિભાગ દ્વારા એશિયાટીક સિંહોની સલામતી માટે સતત કાળજી લેવામાં આવી રહી છે તેનું મોનીટરીંગ કરવામાં આવી રહેલું છે. અને એશિયાટીક સિંહોની સુરક્ષા માટે તમામ પગલા લેવામાં આવી રહ્યા છે તેમ જુનાગઢ વન્યપ્રાણી વર્તુળના મુખ્ય વન સંરક્ષક ડી. ટી.વસાવડા દ્વારા જણાવાયું છે.
આજે 18 જેટલાં એશિયાટીક સિંહો ગુમ થયેલ હોવાના સમાચારો મીડીયામાં પ્રસારીત થયા છે તે અંગે વધુ વિગતો આપતા તેમણે કહ્યું કે, સૌરાષ્ટ્રનો માંગરોળથી લઈ મહુવા, તળાજા સુધીના દરિયાકાંઠાના વિસ્તારોમાં એશિયાટીક સિંહોએ પોતાનું રહેઠાણ બનાવ્યું છે અને અમરેલી, ગીર સોમનાથ, જુનાગઢ તથા ભાવનગર જીલ્લામાં સિંહો વસવાટ છે. વાવાઝોડાની ચેતવણી મળતાં જ દરિયા કાંઠે વસતા એશિયાટીક સિંહો સહીત તમામ એશિયાટીક સિંહોની સલામતી માટે પગલા લેવામાં આવ્યા હતાં અને આ એશિયાટીક સિંહોનું સતત મોનીટરીંગ કરાયું હતું. આ મોનીટરીંગ દરમિયાન રાજુલા વિસ્તારના એશિયાટીક સિંહો દરિયાથી દુર સલામત સ્થળે જાતે જ ખસી ગયા હોવાનું પણ ધ્યાને આવ્યું છે. રાજુલા, જાફરાબાદ, ઉના, કોડીનાર કે મહુવા તાલુકાના દરિયા કાંઠાના વિસ્તારોમાંથી એક પણ એશિયાટીક સિંહ ગુમ થયાનું જણાયું નથી કે આવા કોઈ અહેવાલો પ્રાપ્ત થયા નથી.
એશિયાટીક સિંહોના સ્થાનની માહિતી આપતા વનવિભાગે જણાવ્યું હતું કે સૌરાષ્ટ્રના 674 સિંહો પૈકી 350 કાંઠાના વિસ્તારમાં અમરેલી અને ભાવનગરમાં રહે છે. બાકીના અભયારણ્ય વિસ્તારમાં છે. દરિયાકાંઠાના સૌરાષ્ટ્રમાં કેટલાક પેચોમાં આશરે 40 એશિયાટીક સિંહો રહે છે. અને અમે તેમના પર નજર રાખી રહ્યા છીએ. તેમાંથી પહેલાથી જ અમુક એશિયાટીક સિંહો ઉંચાઈ વાળા સ્થળો પર રહે છે.
